Seirbhísí Eolais
Togra de chuid Chomhdháil Náisiúnta na Gaeilge is ea Gaelport.com, príomhshuíomh eolais na Gaeilge.
Ar an láithreán Gréasáin seo, bíonn an nuacht is déanaí mar a bhaineann sé leis an nGaeilge chomh maith le folúntais, eolas faoi ranganna Gaeilge, cúrsaí oiliúna, imeachtaí , folúntais san earnáil agus fógraí poiblí.
Cuireann Gaelport.com fáilte i gcónaí roimh scéalta agus fógraí ó phobal na Gaeilge in Éirinn agus thar sáile- seol an t-eolas agus íomhánna chuig eolas@gaelport.com.
Anuas air sin, scaiptear nuachtlitir leictreonach ar shíntiúsóirí gach coicís. Is é ‘Eolas’ an teideal atá ar an nuachtlitir ildaite chuimsitheach seo a scaiptear saor in aisce chuig breis agus 6,700 síntiúsóir gach dara Máirt.
Gach lá scaiptear ‘As Na Nuachtáin’, achoimre laethúil ar na scéalta is mó a bhaineann leis an nGaeilge atá foilsithe sna meáin náisiúnta agus áitiúla. Arís, is seirbhís leictreonach atá i gceist le ‘As na nuachtáin’ agus is seirbhís fíor-áisiúil í do dhaoine atá ag obair in earnáil na Gaeilge agus do gach aon duine a bhfuil suim acu i gcúrsaí reatha agus i gceisteanna teanga.
Cuireann an Chomhdháil an tseirbhís eolais, ‘Cogar’ ar fáil do chraoltóirí raidió i gcomhar le hÚdarás Craolacháin na hÉireann. Tá tuilleadh eolais faoi Cogar agus an nuachtlitir leictreonach a scaiptear gach mhí ar fáil ar Cogar.ie.
Le tamall anuas, tá an Chomhdháil ag obair i gcomhpháirt le Foinse a fhoilsítear san Irish Independent gach Céadaoin. Cuireann an Chomhdháil ailt a bhaineann le obair na n-eagras agus ceiseanna teanga ar fáil don nuachtán don mhír ‘Nuacht na hEarnála.’
Fógraíocht agus Poiblíocht
Cuirtear fáilte i gcónaí roimh scéalta agus grainghraif. Déan teagmháil le eolas@gaelport.com